Cervo asumirá boa parte da subida da residencia municipal tras confirmarse o equilibrio das contas
O Concello de Cervo asumirá unha parte importante do incremento de prezos da residencia municipal co obxectivo de aliviar o impacto económico que esta subida supón para as persoas usuarias e para as súas familias. A decisión chega despois de confirmarse os bos resultados da liquidación do orzamento do pasado exercicio, que evidencian a boa situación da facenda local e permiten destinar máis recursos ao sostemento deste servizo.
Segundo explicou a alcaldesa, Dolores García Caramés, o remanente de tesourería derivado desa liquidación permitirá reforzar a achega municipal ao centro residencial, o que contribuirá a reducir o custo final das prazas. A rexedora subliñou que o goberno local leva tempo traballando en alternativas que permitisen amortecer o impacto da subida e garantir ao mesmo tempo a continuidade e a calidade do servizo.
A medida formalizarase no pleno municipal previsto para a próxima semana mediante a fórmula xurídica correspondente. García Caramés destacou que esta decisión é consecuencia dunha xestión económica “equilibrada e sostible”, que agora permite reforzar unha das principais políticas sociais do Concello.
A alcaldesa lembrou que o incremento de prezos xerou preocupación entre as familias e que desde o primeiro momento o executivo municipal buscou fórmulas para reducir o custo das prazas. “Entendíamos o malestar das familias polo repentino incremento e non deixamos de traballar para atopar unha solución, ao tempo que garantíamos a continuidade do servizo na residencia cun novo contrato e cunha nova empresa provedora”, indicou.
Neste sentido, recordou que a semana pasada mantivo un encontro coas familias usuarias para trasladarlles que o Concello estaba a estudar diferentes vías para abaratar o prezo das prazas. Tamén explicou que era necesario agardar á confirmación da liquidación orzamentaria, xa que a administración local está sometida a un plan económico financeiro durante dous anos. “Cinco días despois temos a solución enriba da mesa, polo que quero agradecer a paciencia das persoas usuarias e das súas familias”, sinalou.
A rexedora tamén aproveitou para reclamar maior implicación doutras administracións. En particular, lamentou que a Deputación de Lugo non confirmase ningún tipo de apoio ao financiamento da residencia de Cervo, mentres anuncia a cobertura total dos custos doutros centros en distintos concellos da provincia. García Caramés avanzou que continuará solicitando ese respaldo para garantir un tratamento similar.
Do mesmo xeito, criticou a postura adoptada polos grupos da oposición municipal, socialistas e nacionalistas, aos que acusou de intentar converter o novo contrato da residencia nun elemento de confrontación política en lugar de colaborar na procura de solucións. Segundo afirmou, ningún dos dous grupos promoveu unha posición común para reclamar á Deputación un apoio semellante ao que reciben outros municipios.
A alcaldesa tamén respondeu ás críticas do BNG, que denunciou suposta falta de transparencia no proceso. García Caramés rexeitou esas acusacións e lembrou que a licitación do servizo leva meses publicada nos portais públicos de contratación, onde se poden consultar todos os detalles relativos ás condicións económicas e aos criterios establecidos. “Toda a información está dispoñible para quen queira consultala. O que non podemos é facer o traballo da oposición se nin sequera revisan as plataformas públicas”, manifestou.
En calquera caso, a rexedora preferiu poñer o foco nos avances logrados e subliñou que o obxectivo do goberno local segue a ser responder ás necesidades da veciñanza. Neste contexto, destacou que a residencia municipal constitúe un servizo esencial dentro das políticas sociais do Concello e que a prioridade é garantir a súa continuidade, ao tempo que se busca reducir ao máximo a carga económica para as familias.