Carmen Veiga será a candidata do PSOE á Alcaldía de Barreiros
![Carmen Veiga PSOE Barreiros](https://amarinaxa.com/wp-content/uploads/2023/02/Carmen-Veiga-PSOE-Barreiros-1.jpg)
Carmen Veiga Rodríguez anuncia que será a candidata do Partido Socialista á Alcaldía de Barreiros tras ser reelixida por unanimidade na asamblea local.
“Creo que levamos conseguido cousas moi positivas nestes catro anos e teño a ilusión e as ganas intactas para seguir traballando pola confianza dos meus veciños e veciñas, polo menos, coa mesma intensidade que ata o de agora”, asegura.
Entre os froitos do traballo feito neste mandato, no que asumiu unha tenencia de Alcaldía e a Concellería de Servizos Sociais, destacou a posta en marcha do servizo público de préstamo de material ortoprotésico, posible grazas a un convenio de 20.000€ asinado coa Deputación de Lugo.
Tamén resaltou que o Servizo de Axuda no Fogar está a atender a preto de 70 persoas sen listas de espera e que no peor da pandemia o protocolo implementado polo Goberno local evitou contaxios entre as persoas usuarias e as traballadoras. Ademais, subliñou o traballo realizado en rede co tecido asociativo de Barreiros.
Agora, quere seguir traballando para conseguir máis avances para os veciños e veciñas de Barreiros, en concreto, un Centro de Día e unha residencia, unha depuradora para a praia de Arealonga, un novo apeadeiro do ADIF, ou para poñer en valor o xacemento da Roda.
Veiga explica que quere facelo apostando polos servizos sociais de xeito transversal porque “os socialistas cremos na xustiza social e na igualdade de oportunidades e o Concello ten que ser a primeira man tendida para as persoas máis vulnerables. Ese é o meu compromiso”.
![Carmen Veiga PSOE Barreiros](https://amarinaxa.com/wp-content/uploads/thumbs/2023/02/Carmen-Veiga-PSOE-Barreiros-200x284.jpg)