Carlos Taibo analiza en Foz a guerra de Ucraína e o papel dos imperios na escalada bélica global
O Foro Social da Mariña convoca á cidadanía a participar na conferencia–coloquio titulada “Ucraína, militarismo, imperios”, que terá lugar o mércores 28 de maio ás 20:00 horas na Sala Bahía de Foz. O encontro contará coa intervención do escritor e profesor xubilado Carlos Taibo Arias, un dos pensadores máis destacados do ámbito crítico e alternativo no Estado español.
Na súa intervención, Taibo afondará nos efectos globais do conflito en Ucraína, mais tamén nos intereses xeoestratéxicos dos grandes bloques mundiais e na crecente deriva belicista da política internacional. A guerra, segundo sostén o autor, "amosou con crudeza a cara máis sombría dos nosos tempos: o dominio dos imperios, a submisión da Unión Europea e o esquecemento sistemático das persoas comúns".
A charla pretende ser unha análise profunda e sen filtros do actual panorama xeopolítico, poñendo o foco na escalada armamentística, o incremento sen precedentes do gasto militar, e o rearme promovido desde a UE baixo a lóxica da seguridade. Neste contexto, Taibo alertará tamén sobre as consecuencias que esta estratexia militar ten sobre os servizos públicos, os dereitos sociais, as liberdades civís e a crise ecolóxica que atravesa o planeta.
Desde o Foro Social da Mariña sinalan que o obxectivo da actividade é fomentar a reflexión crítica e o debate social sobre temas que afectan directamente á cidadanía, máis alá da lectura dominante nos medios e nas institucións. A entrada será libre ata completar o aforo.
A visión de Taibo, autor de numerosas obras sobre política internacional, decrecemento, anticapitalismo e alternativas ao sistema, buscará poñer enriba da mesa as múltiples caras da guerra: desde a lexítima condena do militarismo ruso ata a necesaria crítica do expansionismo occidental, sen esquecer o fondo escenario de inestabilidade social, desigualdade e deterioro ambiental que rodea os conflitos do noso tempo.