Carlos Folgueira será o pregoeiro das San Lucas 2025 en Mondoñedo
Mondoñedo xa ten pregoeiro para as súas festas grandes. O elixido para dar o pregón das San Lucas 2025 será Carlos Folgueira, herdeiro do inesquecible Rei das Tartas e garante dunha tradición que converteu á Tarta de Mondoñedo nun símbolo recoñecido máis alá das fronteiras galegas.
A cita terá lugar o xoves 16 de outubro, ás 21:00 horas, no Auditorio Municipal Pascual Veiga. Folgueira será o encargado de abrir oficialmente as celebracións cun discurso no que a memoria, a emoción e o orgullo colectivo se mesturarán co sabor inconfundible dun doce que forma parte esencial da historia mindoniense.
“Esta tarta non é só un postre: é memoria, identidade e un anaco de Mondoñedo presente en cada celebración”, lembran dende a organización. Elaborada sempre con dedicación nas pastelerías locais, pasou de xeración en xeración, transmitíndose de mesa en mesa e de familia en familia, ata converterse nun símbolo compartido.
Dentro deste patrimonio gastronómico e sentimental, a familia Folgueira xogou un papel clave. Foi quen de facer que a Tarta de Mondoñedo viaxase polo mundo, levando con ela un pouco da alma da cidade e consolidando a súa fama internacional.
Con este pregón, Mondoñedo renderá homenaxe a unha tradición viva que continúa sendo orgullo para veciños e visitantes.