Burela presenta unha programación cultural variada e interxeracional para pechar o ano na Casa da Cultura
O Concello de Burela vén de facer pública a programación cultural que se desenvolverá na Casa da Cultura ata final de ano, unha oferta ampla e pensada para público de todas as idades. A actividade inaugural terá lugar mañá, sábado 29 de novembro, ás 20:00 horas, coa posta en escena do musical tributo a Queen e Michael Jackson Leyendas, producido por Diverfest Eventos e dirixido a espectadores de todas as xeracións.
A partir desta primeira cita, a axenda continuará cun abano de propostas que inclúe teatro, concertos, espectáculos humorísticos, actividades infantís e outras iniciativas que se prolongarán ata o 30 de decembro. A concelleira de Cultura, Lina Gómez, destacou que “a programación cultural deste mes de decembro recolle a esencia do que queremos para Burela: variedade, calidade e propostas pensadas para todas as idades”.
Gómez explica que o Concello quixo deseñar un calendario que combina diferentes disciplinas artísticas, con opcións que permiten gozar tanto en familia como en parella ou de maneira individual. “Rematamos o ano cun calendario que combina teatro, música, danza e actividades para o público infantil, ofrecendo opcións para desfrutar en familia e tamén para o público adulto”, sinalou.
A concelleira subliñou tamén a diversidade das propostas que chegarán ao municipio durante estas semanas. “Desde o musical tributo Leyendas ata o tango en directo, o humor de A Presa, o teatro escolar, as propostas para a cativada e incluso Romeo e Xulieta en versión de Prokófiev, buscamos que a nosa Casa da Cultura siga sendo un espazo vivo, diverso e acolledor”, engadiu.
Gómez aproveitou para facer un chamamento á participación cidadá, destacando o valor social que teñen estes encontros culturais. “Animamos a toda a veciñanza a achegarse, participar e facer súa a cultura, porque cada actividade é unha oportunidade máis para construír comunidade”, concluíu.
Dentro da programación, certos espectáculos contarán con venda anticipada de entradas a través de internet: é o caso de Leyendas, do concerto de tango Desde el jardín del alma, previsto para o 13 de decembro, e da representación Romeo y Julieta de Prokófiev, que terá lugar o día 26. Ademais, as entradas tamén poderán adquirirse no despacho habilitado no propio día de cada evento.
Pola súa banda, varias propostas teatrais —como o concerto de Peitoescuro do 6 de decembro, a función Berenguela na gaiola do día 4 e outras representacións profesionais e afeccionadas— contan co impulso e apoio da Vicepresidencia da Deputación da Coruña, que colabora de maneira activa na difusión cultural da comarca.