Burela inicia a humanización da rúa Curros Enríquez para crear un espazo máis accesible e habitable
O Concello de Burela comezará o vindeiro 1 de setembro as obras de humanización da rúa Curros Enríquez, no tramo comprendido entre Castelao e Rosalía de Castro. A actuación, financiada a través do Plan Único da Deputación de Lugo cun orzamento de 217.129,42 euros, desenvolverase en dúas fases e ten prevista unha duración de aproximadamente tres meses.
Durante o período de execución, o tráfico de vehículos quedará restrinxido, seguindo as indicacións da Policía Local. O proxecto contempla a creación dunha plataforma única para mellorar a accesibilidade, a ampliación das beirarrúas actualmente estreitas, a renovación do pavimento con combinación de formigón abuxardado e lastra, así como a instalación de árbores, bancos, xardineiras e a modernización do alumeado público.
O concelleiro de Obras, Ramiro Fernández, destacou que estas melloras buscan “unha rúa máis cómoda, atractiva e pensada para as persoas”, mentres que a alcaldesa, Carmela López, sinalou que se están a ultimar alternativas de estacionamento próximas para minimizar as molestias á veciñanza. Con esta intervención, o goberno local reforza a súa estratexia de humanización do centro urbano, seguindo a senda de actuacións realizadas en vías como Rosalía de Castro.