Burela impulsa un Recuncho Multicultural como espazo de memoria e diversidade
A Casa da Xuventude de Burela acollerá este venres 1 de agosto, a partir das 11:00 horas, unha actividade participativa coa implicación de colectivos, asociacións e persoas pertencentes ás distintas culturas que forman parte do tecido social do municipio. O obxectivo principal do encontro é sentar as bases do futuro Recuncho Multicultural, un novo espazo que se integrará na Biblioteca Municipal como lugar de memoria colectiva, coñecemento compartido e convivencia intercultural.
Ao longo da mañá, traballarase na recollida da tradición oral das diferentes comunidades que conviven en Burela, sen deixar de lado o legado da cultura popular galega. Os relatos, experiencias e saberes que xurdan desta actividade quedarán por escrito, coa intención de seren transmitidos ás novas xeracións como ferramenta educativa e de recoñecemento da diversidade cultural que enriquece o municipio.
A iniciativa, de carácter interxeracional, busca crear un espazo común onde persoas de todas as idades poidan participar, intercambiar vivencias, aprender en conxunto e fortalecer os vínculos entre realidades culturais distintas. O Concello destaca a importancia deste tipo de proxectos para fomentar o respecto, o diálogo e a integración nun contexto marcado pola pluralidade.
A convocatoria está aberta á veciñanza en xeral, máis aló das entidades xa contactadas previamente, polo que desde a organización fan un chamado á participación activa de todas aquelas persoas interesadas en contribuír a este proxecto colectivo.
Con esta proposta, Burela dá un paso máis no seu compromiso coa integración e a posta en valor da diversidade, apostando pola memoria viva e o recoñecemento mutuo como ferramentas para construír unha comunidade máis cohesionada e respectuosa.