Burela impulsa o emprego cun encontro entre empresas e axentes laborais
O Concello de Burela promove unha iniciativa para conectar empresas locais e axentes de emprego, fomentando así a contratación e a mellora da cualificación profesional na comarca. O encontro terá lugar o mércores 19 de marzo, ás 12:00 horas, no Salón de Plenos do Concello.
Durante a xornada, as empresas asistentes poderán coñecer de primeira man os servizos da Orientadora Laboral do Concello, un recurso financiado con fondos autonómicos, e as posibilidades formativas dispoñibles no Centro de Formación Ocupacional. Ademais, contarase coa participación da Cofradía de Pescadores, Cruz Vermella e o Centro de Refuxiados de Burela da ONG Rescate Internacional.
O obxectivo principal deste encontro é facilitar a conexión entre a oferta e a demanda de emprego, proporcionando información sobre os perfís profesionais máis demandados e as diferentes modalidades de contratación dispoñibles. A alcaldesa de Burela, Carmela López, destacou a relevancia desta acción para a economía local: "Queremos que as nosas empresas teñan acceso a todas as ferramentas necesarias para mellorar a súa competitividade e atopar profesionais cualificados. Este evento é unha excelente oportunidade para fortalecer a cooperación entre empresas e entidades de emprego".
O programa incluirá un espazo para a interacción directa entre empresarios e axentes laborais, resolvendo dúbidas e abordando as distintas alternativas de contratación. Ademais, explicaranse as oportunidades formativas dispoñibles na localidade para mellorar a empregabilidade da cidadanía.
Esta iniciativa enmarcase dentro da estratexia global do Concello de Burela para fortalecer o tecido empresarial, impulsar a inserción laboral e promover un mercado de traballo máis dinámico e accesible para todos.