Burela celebrará o seu terceiro Día do Orgullo Mariñeiro o 11 de decembro
O municipio de Burela e o conxunto da Mariña Lucense preparan xa a terceira edición do Día do Orgullo Mariñeiro, unha iniciativa impulsada pola Fundación Expomar que terá lugar o xoves 11 de decembro. A proposta busca reivindicar, un ano máis, a identidade mariñeira da comarca a través de accións divulgativas, culturais e gastronómicas dirixidas á cidadanía de todas as idades.
A organización corre a cargo da Fundación Expomar, coa cooperación do Concello de Burela e da Consellería do Mar da Xunta de Galicia, dentro do programa de axudas do FEMPA, o Fondo Europeo Marítimo, de Pesca e Acuicultura.
A presidenta da Fundación Expomar e alcaldesa de Burela, Carmela López, lembrou que esta celebración “xurdiu hai apenas dous anos, pero arraigou con forza tanto en Burela como no resto da Mariña, porque simboliza o orgullo dunha poboación cunha vida profundamente vinculada ao mar e á pesca”.
A xornada arrancará, un ano máis, nos comedores de varios centros educativos e servizos sociais da comarca. Alí serviranse máis de mil racións de pota procedente da lonxa de Burela, integradas nos menús escolares para achegar ao alumnado a gastronomía mariñeira local.
Pola tarde, a Casa da Cultura de Burela acollerá un coloquio sobre o papel das mulleres nos oficios mariños, baixo o título A muller e o mar. Participarán profesionais de distintos eidos: armadoras, estibadoras, redeiras e representantes da Administración, que compartirán experiencias e visións sobre a súa traxectoria nun sector historicamente masculinizado.
O acto contará ademais coa intervención de Carmela López e da directora xeral de Desenvolvemento Pesqueiro da Xunta, Ángeles Vázquez, quen será a encargada de clausurar a xornada.
A parte cultural completarase cunha variada programación musical na Casa da Cultura. Actuarán o grupo infantil Cantiños Osa do Mar, integrado na SCR Alegría; Arumiños ACM Arume; e a banda Blood Skeleton, que achegarán ritmos tradicionais e actuais a esta celebración identitaria.
Como colofón, a carpa da Praza da Mariña converterase, a partir das 20:00 horas, no epicentro dunha gran degustación gratuíta de receitas preparadas con diferentes especies da lonxa local, todo acompañado por animación musical.
Co obxectivo de evitar aglomeracións como en edicións anteriores, o Concello establecerá aforo limitado no interior da carpa. A entrada seguirá sendo de balde, mais será preciso dispor dun tícket que se repartirá gratuitamente durante o acto previo na Casa da Cultura.