Burela aproba os seus orzamentos para o 2024 que ascenden aos 8 millóns de euros
O Pleno da corporación municipal de Burela aprobou os orzamentos do Concello do ano 2024, a pesar dos votos en contra do Partido Popular. “Valoramos moi positivamente os esforzos dedicados tanto polo equipo de goberno como polos técnicos municipais que participaron na elaboración dos orzamentos”, sinala a concelleira de Facenda, Patricia Eijo.
O orzamento para o exercicio 2024 ascende a un importe global de 8.350.591,64 euros, logrando un incremento do 7,35 % respecto do ano anterior. “Son uns orzamentos traballados e revisados partida a partida, que cumpren co obxectivo de estabilidade orzamentaria e co principio de prudencia, cun equilibrio entre gastos e ingresos”, afirma Eijo.
No cuadrante de ingresos, as transferencias correntes e os impostos directos son as dúas partidas máis cuantiosas, que supoñen unha porcentaxe do 45%sobre o total no primeiro caso, e do 32% no segundo. O 21 % corresponde coas taxas e prezos públicos. “Este é un tributo por un servizo que beneficia directamente ó interesado que o solicita, son os vados, as terrazas e marquesiñas ou as licencias de apertura”, subliña a concelleira. O incremento con respecto ó último orzamento do ano 2022 “vén motivado pola actualización dos índices dos últimos 2 anos”, engade. Con esta contía “fortalecemos as políticas de apoio ó ámbito social, cultural, comercial, educativo e deportivo, xa que se incrementou en algo mais de 89.000 euros o capítulo correspondente”.
Tamén se prioriza garantir a prestación de servizos básicos no municipio, “un capítulo no que se inclúen os subministros, as reparacións ou o alumeado, o que supón un 48 % do total do gasto”, explica.
Ademais, destacan a aportación do Plan Único da Deputación de Lugo, que supón a maiores 378.027,06 euros para o concello. A rexedora criticou que “o Concello teña que facer fronte a un gran número de gastos impropios, que son parte das competencias da Xunta de Galicia pero que esta non asume”. Teñen que asumir “preto dun millón de euros en servizos sociais, educación e SAF que debería poñer a Xunta, as súas subvencións non son suficientes”.
Por outra banda, “cómpre lembrar tamén que o Concello conta cun aforro importante que está a empregar para as obras que se están executando na actualidade, coa incorporación do remanente que vimos facendo nos últimos plenos”, sinala a alcaldesa. Dese xeito, os case 150.000 euros de inversión que figuran no orzamento non reflicten o total de investimento real que se está a realizar grazas ao Plan Único e aos Remanentes de Tesourería do noso Concello”. conclúe.