Burela activa o seu verán máis xuvenil cunha ampla oferta lúdica na Casa da Xuventude
O Concello de Burela vén de presentar a súa programación de verán 2025 destinada á mocidade, unha proposta dirixida a rapaces e rapazas nados entre os anos 2007 e 2013 que combina alternativas de lecer, aprendizaxe e convivencia durante os meses estivais.
O obxectivo da iniciativa, segundo explican desde a organización, é ofrecer unha opción útil para as familias e, ao mesmo tempo, fomentar a implicación da mocidade na vida local e achegar a Casa da Xuventude ao público máis novo.
As actividades desenvolveranse entre o 16 de xullo e o 29 de agosto, cunha programación establecida para cada día da semana:
- Luns: tenis de mesa para fomentar a coordinación e o xogo en equipo.
- Martes: partidas do xogo de cartas UNO, ideais para a diversión e a socialización.
- Mércores: sesións activas de brilé, unha proposta física que mestura estratexia, velocidade e traballo conxunto.
- Xoves: encontros do Grupo de Participación, onde se busca promover o espírito crítico e a iniciativa xuvenil.
- Venres: xornada sen actividade programada, pero con posibilidade de accións puntuais organizadas pola Casa da Xuventude.
Asemade, a partir do 14 de xullo, a Casa da Xuventude abrirá en horario de mañá, das 08:00 ás 14:00 horas, para que os mozos e mozas poidan facer uso libre das instalacións e acceder aos recursos dispoñibles dun xeito autónomo.
Mario Pillado, responsable da Casa da Xuventude, subliñou a vontade de crear un verán participativo e igualitario. “Queremos ofrecer unha alternativa ás familias para este verán e ó mesmo tempo achegar a rapazada á Casa da Xuventude cunha serie de actividades lúdicas que cremos que son do seu agrado e interese para fomentar a participación de forma diversa e en igualdade”, indicou.
As persoas interesadas en participar poderán inscribirse do 1 ao 11 de xullo, ben de maneira presencial na Casa do Concello, ou enviando a ficha cuberta ao correo electrónico: casaxuventude@burela.org. As prazas adxudicaranse por orde de inscrición.