Burela acollerá un taller de defensa persoal dirixido a mulleres
O Concello de Burela organiza para o vindeiro 10 de setembro un obradoiro de defensa persoal especialmente enfocado a mulleres a partir dos 16 anos, aínda que as menores tamén poderán participar sempre que conten con autorización. A iniciativa terá lugar na Aula de Familia da Casa da Cultura e desenvolverase en dúas sesións diferenciadas: de 10:00 a 14:00 horas e de 16:00 a 20:00 horas.
A proposta baséase no Método MAS, unha metodoloxía de defensa persoal feminina que combina aspectos físicos e mentais co obxectivo de dotar ás participantes de ferramentas para detectar sinais de perigo, previr situacións de risco e reaccionar con seguridade e confianza.
As inscricións estarán abertas a partir do 1 de setembro e deberán realizarse de forma presencial no CIM da Casa do Concello. Tamén se poderá solicitar información ou reservar praza a través do teléfono 982 58 06 09 ou do correo electrónico cim@burela.org.