Burela abre un novo aparcadoiro municipal con 43 prazas dentro do seu Plan de Mobilidade Sostible
Burela conta desde esta semana cun novo aparcadoiro municipal, situado entre as rúas Leandro Cucurny e José María González Río, que xa abriu as súas portas ao público. O espazo dispón de 43 prazas de estacionamento, unha delas reservada para persoas con mobilidade reducida, e supón un paso máis dentro das actuacións incluídas no Plan de Mobilidade Urbana Sostible (PMUS) do Concello.
A alcaldesa, Carmela López, explicou que “con este aparcadoiro abrimos o primeiro dos novos espazos de estacionamento que temos previsto poñer en marcha nos próximos meses. Trátase dunha mellora pensada para facer de Burela unha vila máis accesible, cómoda e ordenada, tanto para os residentes como para as persoas que nos visitan”.
A rexedora destacou tamén que a apertura deste novo espazo de estacionamento se complementará cun cambio no sentido de circulación da rúa Leandro Cucurny, no tramo comprendido entre Curros Enríquez e Lamestra, que entrará en vigor a partir do martes 14 de outubro. Esta modificación permitirá mellorar a seguridade viaria e optimizar o fluxo de vehículos nesta contorna, finalizando así os axustes previstos nesta zona dentro do PMUS.
Segundo indicou López, “estes cambios de circulación e a creación de novas prazas de aparcamento axudan a dar resposta a unha das principais demandas da veciñanza, que é contar cun tráfico máis fluído e con mellores opcións de estacionamento no centro urbano”.
A alcaldesa insistiu en que o Plan de Mobilidade Urbana Sostible “non é unha actuación illada, senón unha estratexia integral que busca reorganizar os espazos públicos, favorecer os desprazamentos a pé e mellorar a convivencia entre vehículos e peóns”.
Desde o Concello de Burela lembran que esta iniciativa forma parte dun proxecto máis amplo de modernización urbana, que inclúe tamén melloras na sinalización viaria, a creación de zonas seguras para o peón e a posta en valor de áreas de uso público.