O BNG critica a "mala xestión" do Concello tras perder unha subvención para o Parque dos Indianos
O BNG de Ribadeo denuncia que o Concello perdeu un convenio asinado coa Xunta de Galicia para renovar a contorna do Parque dos Indianos por non poder achegar 12.000 euros dos 47.000 euros totais do proxecto. O convenio caducou o 31 de decembro de 2024 sen que o goberno local fixese a súa achega, polo que as obras quedaron sen executar.
O voceiro do BNG, Pablo Vizoso, criticou a xestión económica do goberno municipal: "Levamos meses alertando sobre a situación á que está levando o concello o goberno do PP. O malgasto acaba tendo consecuencias no día a día, e este é un triste exemplo. Non serve de nada asinar convenios se despois o Concello non é quen de asumir unha pequena porcentaxe da inversión."
Ademais, Vizoso sinalou que o goberno municipal tivo que solicitar un crédito de case un millón de euros a finais de 2024 para poder optar a subvencións e pagar débedas pendentes debido ao esgotamento das contas municipais. Tamén criticou a falta de remate das obras na rúa que conecta a Avenida de Galicia co Parque dos Indianos, deixando as beirarrúas en mal estado desde outubro de 2023. O BNG esixe que se finalicen as actuacións pendentes e que o goberno local cumpra cos compromisos adquiridos.