Begasa inviste 3 millóns de euros na ampliación das súas instalacións en Lugo
A compañía comezou a construción dun novo edificio que albergará un centro de formación para a montaxe de equipamento eléctrico de alta e media tensión, ademais de oficinas e dependencias auxiliares
Begasa, a distribuidora de EDP Redes na provincia de Lugo, continúa apostando pola mellora da calidade da subministración eléctrica en Galicia a través do investimento de 3 millóns de euros na ampliación das súas instalacións no parque empresarial de As Gándaras. Deste xeito, construirá un centro auxiliar nunha segunda parcela na denominada fase I do mesmo polígono onde se atopa a súa sede principal na provincia. Consta de 4.378 metros cadrados e ten unha edificabilidade de 6.567 metros cadrados.
Nela xa se está construíndo un novo edificio de 2.390 metros cadrados que albergará un centro especializado de formación e adestramento para a actividade propia do grupo EDP Redes. O obxectivo do centro será a formación integral en distribución, desde os traballos en altura para o tendido de liñas eléctricas á montaxe do equipamento eléctrico de alta e media tensión, con especial foco na seguridade e a prevención de riscos.
A experiencia e alta cualificación dos traballadores de EDP Redes, xunto a unhas instalacións e un equipo tecnolóxico de última xeración, farán deste novo equipamento un referente na formación dun perfil profesional clave para a transición enerxética, como son os profesionais especializados en operación e mantemento de redes de distribución e transporte eléctrico. O novo edificio estará terminado a finais deste ano e acollerá, ademais, oficinas administrativas e dependencias auxiliares, como arquivos e vestiarios de persoal. Permitirá así mesmo dispoñer dun amplo espazo industrial que será destinado á almacenaxe de material eléctrico e de vehículos propios.
Actualizacións máis dixitalizadas
A crecente electrificación da economía conleva unha necesaria actualización das redes de distribución, cada vez máis dixitalizadas, flexibles, eficientes e resilientes. Neste sentido, Begasa ten unha estratexia definida para aumentar a flexibilidade da rede, ademais de apostar pola súa dixitalización e telemando mediante diferentes tecnoloxías, tanto para optimizar a operativa da rede como para maximizar a capacidade de integración de enerxías renovables, autoconsumo ou vehículos eléctricos.
Esta actuación contribúe decididamente á consecución destes obxectivos e redundará nunha mellora na calidade da subministración eléctrica. “A ampliación das nosas instalacións en Lugo é un paso máis no noso compromiso por mellorar continuamente a calidade do servizo e a atención aos nosos clientes en Galicia, ao mesmo tempo que avanzamos na dixitalización da rede para contribuír á descarbonización da economía e á loita contra o cambio climático”, destacou Juan Miguel Sánchez Alcántara, director de Operacións de EDP Redes España. Durante este 2024, Begasa ten previsto investir 32 millóns de euros, superando así os 29 millóns de euros de investimento executado en 2023.
Líder en calidade
Coa ampliación das súas instalacións en As Gándaras, reforza a súa xa consolidado compromiso coa provincia de Lugo, onde a distribuidora do grupo EDP Redes fornece electricidade a 171.793 persoas por medio de 10.339 quilómetros de liñas de distribución e transporte, 3.205 centros de formación, 22 subestacións e 1.039 GWh de enerxía distribuída. EDP Redes España EDP Redes España xestiona máis de 52.000 quilómetros de redes e 1,4 millóns de puntos de subministración a través de Begasa, E-Redes e Viesgo. É líder en calidade de subministración, rexistrando cada ano o menor TIEPI (tempo de interrupción equivalente á potencia instalada) do sector, grazas ao esforzo investidor dos últimos anos e a dixitalización da rede de distribución.
EDP Redes España é, ademais, a compañía de distribución eléctrica europea líder en sustentabilidade segundo o índice GRESB, onde obtivo unha puntuación de 99,7 puntos sobre 100. Grupo EDP EDP é un grupo enerxético internacional líder en creación de valor, innovación e sustentabilidade. Forma parte dos Dow Jones Sustainability Indexes (World e STOXX) e é ademais líder mundial en enerxía renovable. En España, onde o Grupo EDP emprega de forma directa a máis de 2.000 persoas, é referente no mercado enerxético, presente na xeración, con máis de 5.000 MW de potencia instalada, 1,4 millóns de puntos de subministración en distribución e unha carteira de comercialización a clientes empresariais de enerxía eléctrica, gas natural e servizos cun consumo de máis de 15 TWh/ano.