Barreiros revisa as ordenanzas de auga, saneamento e lixo para adaptalas ás novas necesidades
O Concello de Barreiros someterá a debate no pleno do vindeiro xoves a actualización da ordenanza que regula a prestación do servizo de abastecemento de auga, así como as ordenanzas fiscais de auga, saneamento e recollida de lixo. A reforma busca adaptar a normativa á realidade actual, tanto no ámbito da xestión administrativa como nas condicións de prestación dos servizos.
No caso da ordenanza de abastecemento de auga, unha das principais novidades é a obrigatoriedade de contar cun contador específico para zonas comúns en urbanizacións, como xardíns ou piscinas. Tamén se actualizará o catálogo de infraccións e sancións para garantir un uso responsable do recurso. Ademais, a nova normativa introduce a consideración dos pisos turísticos como un uso non doméstico, o que terá repercusións tanto na taxa da auga como no servizo de recollida de lixo.
A alcaldesa, Ana Ermida, subliña que "se estaba traballando cunha ordenanza do ano 2011, cando a situación do consumo e da prestación do servizo era moi diferente á actual". Segundo explica, os cambios teñen como obxectivo "facilitar o día a día e garantir que quen non contribúe ao mantemento dos servizos cos seus impostos no Concello, o faga a través das taxas correspondentes". "É unha cuestión de equidade e xustiza social", conclúe.
Outro dos aspectos destacados da reforma é a creación dunha bonificación específica para as explotacións gandeiras, debido ao seu alto consumo de auga na súa actividade económica e ao papel fundamental que desempeñan na dinamización do rural. Neste sentido, as ganderías quedarán exentas do pago da cota correspondente ao último tramo de consumo, aplicándoselles unicamente unha tarifa axustada ao Índice de Prezos ao Consumo (IPC) acumulado.
A nova ordenanza tamén introduce un sistema progresivo de tarifas para incentivar o aforro de auga. O prezo variará en función do consumo, establecéndose ata cinco tramos diferenciados. O primeiro, de ata 12 metros cúbicos, terá unha tarifa de 0€, polo que unha familia cun consumo reducido só deberá aboar a cota de mantemento de 15€ cada dous meses. A partir dese limiar, aplicaranse tarifas que oscilan entre os 0,29 euros nos tramos máis baixos ata os 0,57 euros para consumos superiores a 60 metros cúbicos.
O pleno tamén abordará a actualización da ordenanza de recollida de lixo, que leva sen ser revisada dende o ano 2001. A nova tarifa busca axustarse aos custos actuais do servizo, que nos últimos anos experimentou un aumento significativo debido á ampliación de prestacións como a xestión do punto limpo.
Segundo explica a alcaldesa, "o custo do servizo disparouse nos últimos anos, especialmente o tratamento do lixo, que só no último exercicio rexistrou un incremento superior ao 40% por parte de Sogama e que, nos últimos tres anos, duplicou o seu custo". A xestión dos residuos no punto limpo tamén se encareceu debido ao endurecemento dos controis e procedementos establecidos.
"Os concellos vímonos obrigados a destinar unha parte cada vez maior dos nosos recursos a un sistema de xestión de residuos que non é sostible, pero para o que tampouco hai unha alternativa viable a día de hoxe", afirma Ermida en referencia a Sogama.
Con esta actualización, a taxa do lixo en Barreiros pasará a ser de 9 euros ao mes.