Barreiros mergúllase en “Un mar de diversidade II” cun stand aberto á reflexión e á inclusión
O Concello de Barreiros acollerá o vindeiro martes, 3 de decembro, o stand “Un mar de diversidade II”, unha proposta divulgativa que busca achegar á cidadanía unha reflexión colectiva sobre a diversidade, a empatía e a necesidade de contornas máis accesibles para todas as persoas. A actividade estará aberta ao público entre as 10:30 e as 13:30 horas na casa consistorial.
Esta acción enmárcase no proxecto educativo Un mar de diversidade, promovido pola Asociación Guillem Veiga Iglesias, que durante os dous últimos anos percorreu centros educativos da Mariña Lucense coa intención de fomentar o respecto e o valor das diferenzas desde as primeiras etapas da vida. O programa contou co apoio do FEMPA da Consellería do Mar, a través do GALP A Mariña-Ortegal, permitindo que a iniciativa medrase e se consolidase.
Agora, o proxecto dá un paso máis e traslada o seu espírito ás rúas, convidando a toda a veciñanza a participar nun percorrido sensorial que promove a empatía, a reflexión e a defensa dos dereitos das persoas con discapacidade. Como explican desde a organización, trátase de “abrir unha xanela cara á diversidade” e facer partícipe á comunidade dun espazo pensado para comprender mellor as realidades alleas.
O stand incluirá diversas experiencias interactivas, nas que as persoas visitantes poderán poñerse, simbolicamente, no lugar de quen afronta barreiras físicas, sensoriais ou sociais no día a día. A finalidade é visibilizar eses obstáculos, recoñecer as capacidades individuais e reforzar a importancia de crear espazos máis inclusivos que garantan a participación plena de todas as persoas.
Esta mostra é unha pequena parte do obradoiro que a Asociación Guillem Veiga Iglesias desenvolve nos colexios da comarca, onde nenos e nenas se mergullan nun “mar simbólico” para descubrir que a diversidade é unha riqueza que debe ser recoñecida e respectada.
Desde o Concello de Barreiros animan á cidadanía a participar nesta proposta “que nos convida a navegar pola empatía, o respecto e a inclusión” e a coñecer de preto esta iniciativa que continúa medrando co apoio das institucións e da comunidade educativa.