Barreiros inaugura un ximnasio municipal moderno e accesible
Barreiros contará a partir do mes de maio cun ximnasio municipal completamente renovado, equipado con maquinaria de última xeración e un sistema de acceso que permitirá unha ampla dispoñibilidade horaria. O goberno local aposta así por fomentar a actividade física e os hábitos de vida saudable entre a veciñanza. Para dar a coñecer este novo servizo, o Concello organizará xornadas de portas abertas con actividades destinadas a sensibilizar sobre os beneficios do exercicio físico, contando coa participación de profesionais do sector.
O concelleiro de Dinamización Veciñal, Dani García, explica que a instalación deportiva "presentaba múltiples deficiencias que obrigaron ao seu peche no seu día por incumprir as condicións técnicas esixidas para a súa actividade". Despois de estudar distintas opcións, o goberno local optou por unha reforma integral que mellora a accesibilidade e crea novos espazos compartidos co pavillón municipal, como a enfermería, a recepción, un almacén e baños adaptados, cubrindo así carencias previas e garantindo o cumprimento da normativa vixente.
A renovación inclúe tamén a substitución do 100% da maquinaria e equipamentos, reorganizando as salas en función das diferentes zonas de adestramento: cardio, musculación, peso libre e exercicios funcionais. Ademais, realizáronse melloras no chan, illamento acústico e colocáronse novos espellos para facilitar unha práctica deportiva máis controlada.
Esta reforma súmase ás melloras levadas a cabo nos últimos anos na instalación deportiva municipal, entre as que destacan a renovación da cuberta do pavillón, a modernización da iluminación da pista e a instalación dun portalón de acceso directo por motivos de seguridade.
O proxecto fíxose realidade grazas ao financiamento da Vicepresidencia da Deputación de Lugo, cunha achega de 144.546,42 euros, complementada cunha subvención da Xunta de Galicia de 54.546,42 euros. O Concello, pola súa banda, investiu máis de 20.000 euros de fondos propios e asumiu a compra da maquinaria non cuberta polas subvencións.
No próximo pleno municipal aprobarase a nova ordenanza de uso e fiscalidade do ximnasio, que establecerá prezos reducidos para as persoas empadroadas en Barreiros e detallará as condicións de acceso á instalación. O obxectivo do Concello é ofrecer un espazo deportivo moderno, funcional e accesible para toda a veciñanza.