Barreiros impulsa a conciliación familiar cun campamento infantil en Semana Santa
O Concello de Barreiros, a través da área de Igualdade, pon en marcha unha nova edición do campamento infantil +Concilia Abril, unha iniciativa destinada a favorecer a conciliación familiar durante o período non lectivo da Semana Santa.
O campamento desenvolverase no CEIP de San Cosme de Barreiros entre o 14 e o 21 de abril, nos días laborais, en horario de 9:30 a 13:30 horas. Está dirixido a nenos e nenas nados entre o 1 de xaneiro de 2013 e o 31 de decembro de 2021, e contará con 50 prazas dispoñibles.
As familias interesadas poderán inscribir aos seus fillos e fillas ata o 2 de abril, presentando a solicitude no rexistro do Concello en horario de 9:30 a 14:30 horas ou a través da sede electrónica municipal. A participación no programa terá un custo de 5 euros para menores empadroados en Barreiros e de 20 euros para os que non estean censados no municipio.
Os criterios de selección e os modelos de inscrición poden consultarse na web oficial do Concello, www.concellodebarreiros.gal, onde están dispoñibles as bases completas do programa.