Autoridades e veciñanza celebran os 25 anos de Ribadeo como destino turístico de referencia
O auditorio municipal Hernán Naval acolleu este sábado a celebración de Ribadeo 20/25, un evento para conmemorar os 20 anos da declaración de Ben de Interese Cultural (BIC) e os 25 anos da designación como Destino Turístico. Durante o acto, que contou cunha destacada representación institucional, houbo música en directo, proxeccións audiovisuais e agasallos conmemorativos.
As concelleiras de Cultura e Turismo, Begoña Sanjurjo e Marta Saiz, abriron a quenda de intervencións, seguidas polos exalcaldes Balbino Pérez Vacas e José Carlos Rodríguez Andina, impulsores das declaracións que situaron a vila ribadense no mapa do turismo galego. Unha das partes máis relevantes da xornada foi a mesa redonda na que participaron os rexedores dos sete municipios galegos recoñecidos como Destino Turístico hai 25 anos: A Pobra de Trives, Leiro, Monterrei, Sanxenxo, Baiona, Mondariz-Balneario e Ribadeo. Todos destacaron a importancia daquela distinción e aproveitaron a ocasión para promover as súas respectivas localidades.
O acto pechouno o alcalde de Ribadeo, Dani Vega, xunto co presidente da Xunta de Galicia, Alfonso Rueda, quen puxeron en valor o potencial turístico da comarca e o traballo realizado ao longo destas dúas décadas para manter e mellorar a súa oferta cultural e patrimonial. Antes da despedida, tivo lugar unha foto de familia á que se uniu o xornalista ribadense Fabián Pérez, presentador do evento.
A celebración contou coa asistencia de numeroso público, incluíndo veciñanza, representantes dos concellos veciños, membros da Xunta, da Deputación de Lugo, do Parlamento galego, da confraría de pescadores de Ribadeo, do xulgado de paz, de Acisa Ribadeo e dos centros educativos do municipio. Unha xornada de homenaxe e posta en valor dun legado que segue impulsando o futuro turístico e cultural da vila.