Augas de Galicia rexeitou o proxecto da macrocentral hidroeléctrica reversible Xistral
![Valadouro Recare e Vilacampa central hidroelectrica (1)](https://amarinaxa.com/wp-content/uploads/2022/02/Valadouro-Recare-e-Vilacampa-central-hidroelectrica-1.jpg)
Augas de Galicia rexeitou o proxecto da macrocentral hidroeléctrica reversible Xistral no Valadouro. O informe que remitiu negativamente é vinculante ao anteproxecto presentado pola empresa zaragozana Atalaya Generación.
O devantido informe toma en consideración unha serie de indicacións do Servizo de Planificación e Programación Hidrolóxica que falan da afectación a varios cauces.
Así, se a empresa quere seguir adiante coas instalacións terá que modificar e presentar outro anteproxecto. Un apartado do informe di que aínda que os regatos de Recaré, Vilacampa e Balsadas non forman parte das masas de auga delimitadas para protexer, consideran que a instalación das balsas ocupando os seus leitos supoñen novos elementos que compromenten a continuidade fluvial dos cursos de auga.
O anteproxecto afectaba na súa maior parte aos municipios de Alfoz e O Valadouro, onde a maior parte dos veciños opoñíanse e por iso crearon unha Plataforma informativa.
REUNIÓN CO DELEGADO DA XUNTA
O delegado territorial da Xunta en Lugo, Javier Arias, mantivo unha reunión con representantes da plataforma veciñal de afectados pola central hidroeléctrica do Valadouro para explicar en detalle o contido do informe desfavorable sobre a solicitude de instalación desta central que é determinante e que, polo tanto, impide a viabilidade deste anteproxecto, ao considerar que afecta e interrompe as canles fluviais.
Na reunión, á que tamén asistiron técnicos de Augas de Galicia, púxose de manifesto que este informe conclúe que ese aproveitamento hidroeléctrico reversible no Xistral é inviable, porque é incompatible cos obxectivos da planificación hidrolóxica de Galicia-Costa.
Neste sentido, xustifica que as instalacións recollidas no proxecto presentado para o río Ouro, con balsas ocupando os leitos de varios regos existentes na zona, supoñen novos elementos que comprometen a continuidade fluvial destes cursos de auga.
O delegado de Xunta en Lugo considerou que como calquera proxecto “este debe cumprir coa lexislación galega”, e neste senso sinalou que “seguindo o establecido no Plan Hidrolóxico Galicia-Costa, as actuacións que se formulan non resultan compatibles coa normativa de aplicación en materia de augas”.
Por último, Javier Arias explicou que “desde a Xunta temos demostrado o compromiso co desenvolvemento das enerxías renovables e con todos aqueles proxectos que respecten escrupulosamente a normativa e garantan a súa compatibilidade co medio e cos recursos naturais, así como con toda a actividade que se leva a cabo no rural galego”.