As xornadas gastronómicas Asturias en Ribadeo terán lugar os vindeiro 27, 28 e 29 de outubro
![Xornadas gastronómicas Asturias en Ribadeo Acisa](https://amarinaxa.com/wp-content/uploads/2023/10/Xornadas-gastronomicas-Asturias-en-Ribadeo-Acisa.jpg)
A sexta edición das xornadas gastronómicas Asturias en Ribadeo de Acisa celebraranse do 27 ao 29 de outubro e nelas participan 12 locais hostaleiros.
A presidenta de Acisa, Carmen Cruzado, indicou que “desde Acisa seguimos apostando polas xornadas gastronómicas Asturias en Ribadeo como actividade dinamizadora da nosa hostalaría. Con elas queremos render así homenaxe á veciñanza asturiana, que todas as fins de semana do ano se achega ata Ribadeo a tomar os viños, os vermús, a comer, a cear, a pasear ou a mercar no comercio local. A súa presenza é moi importante para nós e por iso volven un ano mais estas xornadas”.
O xerente da Asociación de Comerciantes, Industriais, Servizos e Autónomos, Jesús Pérez, explicou que “son 12 os locais participantes, que ofrecerán tapas e menús especiais ao longo da última fin de semana de outubro. As diferentes propostas gastronómicas asturianas poderanse encontrar nos seguintes establecementos hostaleiros: Galipizza, La Solana, Queimada, O Indiano, Mareta, A Horta de San Roque, La Bugalla, La Flor de Jose, Asador La Quinta, Costa Verde, O Alén e O Lar de Manolo”.
Así, engadiu que “todas as propostas gastronómicas dos locais participantes poderán consultarse nas redes sociais de Acisa a partires da semana que vén”. "Queremos animar a asturianos e galegos a que vaian facendo un oco nas súas axendas para vir a Ribadeo a saborear todas as propostas que nos ofrecerá a hostalaría local. Calquera día é un bo momento para vir ata Ribadeo, pero si temos a posibilidade de facelo para saborear a gastronomía asturiana, mellor que mellor”, concluíron.