As recomendacións ante as picaduras das carabelas portuguesas
A Dirección Xeral de Saúde Pública da Xunta de Galicia advertiu á poboación sobre o incremento de carabelas portuguesas (Physalia physalis) en varias praias da comunidade. Estas criaturas mariñas, coñecidas polas súas dolorosas picaduras, motivaron a publicación dun protocolo de actuación en caso de contacto.
En primeiro lugar, recoméndase que a persoa picada saia da auga inmediatamente e elimine calquera resto de tentáculo do corpo. Para esta tarefa, aconséllase non tocar directamente cos dedos, senón usar pinzas, luvas ou un obxecto ríxido. É fundamental evitar rascar ou fregar a zona afectada para non incrementar a liberación de veleno.
O segundo paso consiste en lavar a zona con auga de mar limpa, asegurándose de que non contén fragmentos de tentáculos. Nunca se debe usar auga doce, xa que isto podería liberar máis veleno. Tamén se desaconsella o uso de amoníaco, vinagre ou ouriños.
A continuación, debe aplicarse frío na picadura cunha bolsa de plástico con xeo durante 15 minutos, o que axuda a limitar a propagación do veleno. Finalmente, desinfectarase a ferida con tintura de iodo para previr infeccións, e é recomendable evitar unha nova picadura, xa que a sensibilidade ao veleno pode aumentar.
Se a praia conta con servizo de socorrismo, aconséllase acudir a eles inmediatamente. No caso de síntomas graves como náuseas, vómitos, mareos, ou dificultade para respirar, débese buscar asistencia médica urxente ou chamar ao 112. Este aviso de Sanidade subliña a importancia de extremar as precaucións nas praias galegas, especialmente durante os meses de verán.