As obras de mellora do pavillón da rúa Alfredo Deaño comezarán en setembro
O alcalde de Ribadeo, Dani Vega, anunciou que en setembro arrincarán as obras de reforma do pavillón da rúa Alfredo Deaño, cun investimento de 185.000 euros. O rexedor destacou que se trata dunha actuación “moi necesaria”, pois o recinto leva anos cun notable deterioro. “Literalmente chove máis dentro que fóra”, asegurou, lembrando que numerosas entidades deportivas se viron obrigadas a soportar durante tempo “un estado de abandono total”.
Segundo explicou Vega, o Concello traballou previamente en diálogo cos clubs e asociacións usuarias, identificando as principais deficiencias do inmoble. “Agora que a obra xa está licitada, imos comezar no mes de setembro cunha intervención ampla”, precisou.
A reforma inclúe a reparación da cuberta para eliminar as filtracións de auga, a substitución da cristalería danada e a mellora das instalacións interiores, moitas delas en desuso ou invadidas pola vexetación. Tamén se renovará a zona exterior, coa eliminación de pintadas, e acometerase a reparación do espazo empregado pola asociación Amigos da Gaita, que tamén padece goteiras.
“Queremos dispoñer dun pavillón en perfectas condicións, tanto para a práctica deportiva como para o uso cultural”, subliñou o alcalde, quen remarcou que esta actuación permitirá recuperar un equipamento esencial para a vida local.
O anuncio realizouse durante a visita ás instalacións, na que participaron o propio alcalde e o concelleiro de Deportes, Francisco José Silvent.