As Minas da Pontenova prepara unha nova edición do seu festival que será en xuño
A Asociación Cultural e Deportiva As Minas da Pontenova prepara unha nova edición do seu Festival das Minas para o día 16 e 17 de xuño.
Así, a festa comezará na noite do venres 16 cos cantos de taberna polos bares do pobo a cargo de A Chocolateira, Asubíos da Chaira e Tarde, mal e arrasto.
O sábado 17 haberá unha cea popular por tan só 20 euros os adultos e 10 os nenos, e ademais contarán cun sorteo de 4 bonos para vivir a experiencia na mina Consuelo e o descenso en tirolina.
Xa pola noite, ás 23.30 horas, será a quenda das actuación musicais a cargo de Leña Verde, The Skarnivals e La Disquetera.
“Aos cantos poderanse unir e participar os que queiran”
Luis Miguel Rivas é o presidente da Asociación Cultural e Deportiva As Minas.
Este festival muda de data de decembro a xuño. Porque motivo?
O festival comezou facéndose no verán aínda que despois mudamos ao mes de decembro. Pero quixemos retomar de novo estas datas.
Que se poderá facer?
Sobretodo desfrutar, e despois poderase escoitar musical galega en diferentes e atractivas propostas. Comezará cos cantos de taberna, seguirá co folk de Leña Verde de Pol, co ska de Skarnivals, que están de xira con novo disco, e de rock a cargo de La Disquetera. A maiores poderemos deleitarnos na tradicional ruta das minas e participar no sorteo que se celebrará durante a cea popular, para entrar na mina Consuelo e descender na tirolina.
Pode debullarnos o programa?
A festa comezará na noite do venres 16 cos cantos de taberna polos bares do pobo. O sábado 17 haberá unha cea popular por tan só 20 euros os adultos e 10 os nenos, e ademais contarán cun sorteo de 4 bonos para vivir a experiencia na mina Consuelo e o descenso en tirolina. Xa pola noite, ás 23.30 horas, será a quenda das actuacións musicais.
Como se pode participar nos cantos de taberna?
Estes cantos estarán dirixidos pola Chocolateira, grupo local pontenovés, que percorrerán os bares do pobo xunto a outros dous grupos, Tarde mal e arrastro de Ribadeo e Asubíos da Chaira de Cospeito, e a este cantos poderanse unir e participar todos os que queiran.
Onde se mercan os tiquets da cea?
Estes tiquets, que son necesarios, pódense mercar nos bares San Briz, na casa da cultura, no bar Rony e no bar Puente.
