As festas patronais de Burela comezan este xoves 25 de maio
As festas patronais de Burela celebraranse do 25 de maio ao 5 de xuño e xa se saben as orquestras e actividades que amenizarán estes días de celebracións. Os asistentes a estas xornadas festivas poderán gozar cos numerosos actos programados para a ocasión.
O xoves 25 será a inauguración ás 20.00 horas na casa da cultura da mostra Burela, a súa historia a través dos seus libriños das festas. Na xornada do venres 26 ás 21.00 horas oficiarase a misa en honra á Virxe do Carmen, seguida de procesión acompañada pola Banda de Gaitas Dambara. Nesta xornada tamén se estreará o alumeado festivo.
O sábado 27 ás 20.00 horas no auditorio municipal terá lugar a lectura pregón a cargo de Albano González Cancio, dando paso á actuación do dúo Manopuesta. O domingo 28, a partir das 10.00 horas terá lugar un rastrillo popular solidario, e ao longo da tarde, haberá unha festa infantil e xuvenil con inchables.
Ao día seguinte, o luns 29 ás 19.30 horas, o auditorio acollerá a proxección do documental de Paco Salgueiro Burela: Sinal de Identidade dun Pobo. E o mércores 31, os máis pequenos poderán desfrutar, a partir das 20.30 horas, dun gran Karaoke Infantil e Xuvenil na casa da cultura. O xoves 1 de xuño, ás 21.00 horas será a quenda do gran Karaoke Sénior.
Na véspera dos días grandes, o venres 2, terá lugar unha gran verbena a cargo das orquestras Alkar e América a partir das 23.00 horas, e pola mañá dos Acordeonistas da Mariña na zona do hórreo.
O sábado 3, dará inicio a confección da alfombra floral, seguida do pasacalles a cargo do grupo de gaitas Asubíos da Chaira e a Banda de Música EGS. Ás 14.00 horas, será a sesión vermú amenizada pola orquestra Saudade.
Pola tarde, ás 20.00 horas, concerto da Agrupación Musical Santo Inocencio e a Banda de Música EGS. Pola noite, ás 21.00 horas oficiarase a misa na igrexa parroquial, seguida da procesión da baixada ao porto e un espectáculo de fogos de artificio. Para rematar, ás 23.00 horas, será a verbena a cargo das orquestras A Favorita e Saudade.
Na xornada do domingo 4, os actos comezarán con pasacalles a cargo da Banda A Nosa Señora do Nordes e a Agrupación Musical Santo Inocencio. Ás 12.00 horas, oficiarase no porto a misa e a procesión marítima. E ás 14.00 horas, sesión vermú coa orquestra Pontevedra.
Pola tarde, a partir das 17.00 horas pasacalles e para rematar, ás 22.30 horas, verbena a cargo das orquestras Pontevedra e El Combo Dominicano.
O luns 5, ás 12.00 horas terá lugar a procesión de subida desde o porto ata a igrexa parroquial, dando paso á misa cantada. Ás 14.00 horas sesión vermú amenizada por orquestra Ritmo Joven, formación que ademais animará a verbena da noite xunto coa Panorama.
O barco Siempre San Prudencio, un palangreiro de superficie que traballa nos caladoiros de Gran Sol e ten 28 metros de eslora, será o encargado de levar a imaxe da Virxe do Carmen na procesión marítima do domingo.
Na última xornada festiva, o martes 6, os asistentes poderán acudir ás 12.00 horas á cerimonia da ofrenda floral que levará a cabo no porto de Burela.
