Alfoz retoma o programa de estimulación cognitiva “ActivaMENTE” para maiores de 55 anos
O Concello de Alfoz continúa a súa aposta polas actividades dirixidas ao envellecemento activo coa posta en marcha dunha nova edición do programa de estimulación cognitiva “ActivaMENTE”, pensado para pensionistas e persoas maiores de 55 anos.
As sesións comezarán o xoves 17 de outubro ás 10:30 horas, no Centro Sociocultural de Alfoz, e manteranse abertas ao longo de todo o ano, co obxectivo de ofrecer un espazo estable no que traballar a memoria, a atención e outras habilidades mentais a través de dinámicas amenas e participativas.
Desde o Concello explican que esta actividade busca previr o deterioro cognitivo, favorecer a autonomía persoal e fortalecer as relacións sociais, creando un ambiente de aprendizaxe e convivencia que contribúa ao benestar emocional das persoas participantes.
As inscricións poden realizarse durante todo o ano nas dependencias municipais ou chamando ao 982 55 80 01. O programa conta con profesionais especializados que acompañan aos grupos en cada sesión, adaptando os exercicios ás necesidades e capacidades de cada persoa.
O Concello de Alfoz anima á veciñanza a sumarse a esta iniciativa, que combina o coidado da mente co pracer de compartir bos momentos, reforzando o compromiso municipal coa saúde e a calidade de vida das persoas maiores.