Alfoz reforza a súa promoción turística cunha nova sinalización en todo o municipio
O Concello de Alfoz continúa avanzando na posta en valor do seu patrimonio natural e cultural coa recente execución do proxecto Mellora da sinalización turística do Concello de Alfoz. Esta intervención, financiada na súa totalidade ao abeiro da convocatoria 2025 de axudas a concellos de menos de 10.000 habitantes para melloras en infraestruturas turísticas, supuxo un investimento de 30.007,01 euros, dos cales a Axencia Turismo de Galicia subvencionou 30.000.
O plan inclúe a instalación de nova sinalización informativa, patrimonial e de acceso ao municipio, así como a actualización e mellora de distintos itinerarios de especial relevancia turística. As actuacións estendéronse polas parroquias de O Pereiro, Adelán, Carballido, Bacoi, Reirado e Mor, contribuíndo a unha maior coherencia e visibilidade do territorio.
Entre as accións máis destacadas atópanse a colocación de cinco paneis de benvida nas principais vías de entrada ao concello, a instalación dun panel interpretativo na Pesa de Correlos —un elemento tradicional de gran interese cultural— e a renovación de dous paneis informativos na ruta Pena Abaladoira–Escouridal, adaptados á estética e ao carácter natural da Serra do Xistral.
A alcaldesa e responsable da área de Turismo, Efigenia Maseda Paz, subliña que “este proxecto dá un paso adiante na forma de recibir e acompañar a quen visita Alfoz. A nova sinalización mellora a experiencia turística, ofrece unha visión coherente do territorio e reforza a identidade das nosas parroquias”. Engadiu tamén que a mellora da sinalización na ruta Pena Abaladoira–Escouridal e na Pesa de Correlos “favorece un turismo sostible e educativo, permitindo que tanto veciños como visitantes descubran Alfoz a través dunha información clara e respectuosa co entorno”.
Desde o Concello agradecen a colaboración da Axencia Turismo de Galicia e manifestan a súa intención de continuar impulsando iniciativas que contribúan á promoción turística e ao desenvolvemento local, apostando por un modelo que combine conservación, accesibilidade e posta en valor do patrimonio.