Alfoz impulsa un obradoiro para mellorar os hábitos de descanso e promover un sono saudable
O Concello de Alfoz vén de anunciar a posta en marcha dun obradoiro centrado no repouso e no sono, unha iniciativa divulgativa coa que se pretende poñer en valor a importancia de durmir ben como ferramenta fundamental para manter un bo estado de saúde. A proposta, que leva por título “Repouso e soño”, pretende ofrecer coñecementos prácticos e accesibles para que a veciñanza poida mellorar a calidade do seu descanso diario.
A sesión terá lugar o 12 de decembro, ás 10:30 horas, no Centro Sociocultural de Alfoz, e estará centrada en abordar os principais factores que inflúen no sono. Segundo explica a organización, durante o encontro trataranse cuestións como a función esencial do sono no equilibrio físico e emocional, os cambios que experimenta o descanso co paso dos anos ou os hábitos que favorecen —ou prexudican— unha noite reparadora.
O programa inclúe tamén pautas prácticas para mellorar o repouso, así como unha análise crítica sobre o uso de medicación destinada a facilitar o sono, co obxectivo de fomentar alternativas máis saudables e sostibles no tempo.
O Concello lembra que as inscricións permanecen abertas ata o 10 de decembro. As persoas interesadas poden formalizar a súa participación a través da educadora familiar, os luns e mércores en horario de 9:00 a 14:00 horas, ou chamando ao teléfono 982 55 80 01 (ext. 6).