Alfoz abre a inscrición do Ludiverán, o seu programa de lecer educativo para o verán
O Concello de Alfoz vén de anunciar unha nova edición do Ludiverán, o seu programa estival de ocio educativo dirixido á infancia do municipio. A iniciativa desenvolverase entre o 30 de xuño e o 29 de agosto, ofrecendo unha ampla variedade de actividades pensadas para fomentar o xogo cooperativo, a creatividade e a convivencia nun entorno seguro e adaptado ás distintas idades.
As xornadas terán lugar de luns a venres en horario de 9:00 a 14:00 horas, aínda que o programa inclúe tamén opcións de entrada flexible ás 10:00 h e saída ás 13:30 h, co obxectivo de facilitar a conciliación da vida laboral e familiar das nais e pais participantes.
O prazo de inscrición abrirá o vindeiro 2 de xuño e permanecerá activo ata o día 12 do mesmo mes. As prazas son limitadas, polo que desde o Concello recoméndase realizar a solicitude canto antes. As familias interesadas poden formalizar a inscrición a través da sede electrónica municipal ou de maneira presencial na Casa do Concello. As bases completas e toda a información necesaria están xa dispoñibles na páxina web do Concello de Alfoz.
O Ludiverán consolídase así como unha alternativa de lecer e aprendizaxe durante os meses de verán, ofrecendo ás familias do municipio unha ferramenta útil para a conciliación e aos nenos e nenas, unha experiencia enriquecedora chea de xogo, amizades e diversión.