Adxudicadas por 17,5 millóns as obras de modernización da liña ferroviaria entre Ribadeo e Cudillero
O Ministerio de Transportes e Mobilidade Sostible vén de adxudicar, a través de Adif, un contrato fundamental para a modernización do tramo ferroviario que conecta Ribadeo con Cudillero, dentro da liña de ancho métrico Ferrol-Pravia. O investimento ascende a 17,5 millóns de euros e permitirá eliminar o actual sistema de bloqueo telefónico, substituíndoo por un sistema automatizado con control remoto.
O contrato contempla a redacción do proxecto construtivo, a execución das obras, as probas técnicas e a posta en servizo das novas instalacións de seguridade. A actuación ten por obxectivo principal dotar este tramo, de aproximadamente 110 quilómetros, dunha infraestrutura moderna e eficiente que mellore a seguridade e a capacidade da liña.
Concretamente, implantarase un sistema de bloqueos automáticos regulados por telemando desde o Centro de Control de Tráfico Centralizado (CTC) de El Berrón. Isto suporá un salto cualitativo nas comunicacións ferroviarias deste corredor, mellorando a fiabilidade do servizo e reducindo os tempos de resposta ante calquera incidencia.
Esta obra forma parte da aposta estratéxica do Goberno estatal pola mobilidade sostible e pola mellora das conexións ferroviarias en zonas de vertebración territorial como a Mariña lucense e o occidente asturiano.