Aberto o prazo para participar no certame fotográfico “Xove, a súa costa e o seu mar”
O Concello de Xove vén de convocar a undécima edición do seu Concurso de Fotografía Medioambiental, unha iniciativa que busca fomentar a creatividade e a participación cidadá na defensa da natureza a través da imaxe. Baixo o lema “Xove, a súa costa e o seu mar”, o certame convida a persoas de calquera idade a presentar instantáneas que reflictan a riqueza paisaxística e mariña do municipio.
As bases establecen que as persoas interesadas deberán entregar a documentación requirida nun sobre pechado co título do concurso escrito no exterior. No interior deberán incluír a ficha de inscrición e a declaración de autoría, unha copia do NIF e un CD ou pendrive coas imaxes en formato dixital. As propostas poderán rexistrarse na Casa do Concello ou enviarse por correo postal ordinario, sempre que a data de presentación non supere o 30 de setembro de 2025.
O certame contempla unha única categoría con cinco premios en metálico: 120 euros para o primeiro posto, 100 para o segundo, 90 para o terceiro, 75 para o cuarto e 65 para o quinto.
Con esta convocatoria, o Concello de Xove reafirma o seu compromiso co coidado do medio natural e anima á veciñanza a plasmar, a través da fotografía, a beleza e a importancia da súa contorna.