Aba Taano levará o seu góspel africano por toda a provincia de Lugo
A provincia de Lugo converterase no mes de decembro nun auténtico escenario para o mellor góspel africano da man de Aba Taano, o grupo ugandés que revolucionou este xénero en Europa. Os cinco artistas, recoñecidos pola súa forza vocal e carisma sobre o escenario, iniciarán unha xira solidaria que os levará a Meira, Ribadeo, Foz, Viveiro e Vilalba entre os días 4 e 8 de decembro.
Aba Taano —que significa “os cinco” na lingua luganda— ofrece un espectáculo a cappella, vibrante e cheo de ritmo, no que mesturan góspel, canto africano e pop. Co seu estilo orixinal, xa conquistaron o público europeo, actuando nos principais teatros e auditorios desde 2008 e obtendo 11 premios internacionais polo seu talento e posta en escena.
A xira lucense comezará o 4 de decembro en Meira, continuará o 5 en Ribadeo, o 6 en Foz, o 7 en Viveiro e rematará o 8 en Vilalba. En cada concerto, os asistentes poderán gozar dunha proposta musical distinta, chea de enerxía e emoción, cun marcado carácter solidario, xa que os fondos recadados destinaranse ao proxecto “Música para salvar vidas”, que apoia a formación e desenvolvemento de mozos en Uganda a través da arte.
En Foz, o concerto celebrarase na Sala Bahía o sábado 6 de decembro ás 19:00 horas, co apoio do Concello de Foz. As entradas teñen un prezo de 12 euros e pódense mercar en giglon.com ou na billeteira unha hora antes do comezo.
Os organizadores destacan que esta xira “é unha oportunidade única para descubrir a forza e a espiritualidade do góspel africano, interpretado por cinco voces que transmiten esperanza, alegría e solidariedade en cada nota”.
DATAS
- 4 de decembro en Meira ás 20.00 horas
- 5 de decembro en Ribadeo ás 20.00 horas
- 6 de decembro en Foz ás 19.00 horas
- 7 de decembro en Viveiro ás 19.00 horas
- 8 de decembro en Vilalba ás 20.00 horas