AAVV de Mor organiza unha excursión cultural polos Oscos o 25 de maio
A Asociación de Veciños de Mor, en Alfoz, vén de anunciar unha excursión aberta a toda a veciñanza e ao público interesado, que se celebrará o domingo 25 de maio. O obxectivo é ofrecer unha xornada de lecer cun compoñente cultural e natural, percorrendo diferentes puntos de interese da zona dos Oscos, xa en territorio asturiano.
O itinerario inclúe saída en autobús pola mañá desde Alfoz, con primeira parada na Casa Natal do Marqués de Sargadelos, situada en Santa Eulalia de Oscos. A continuación, está prevista unha visita guiada ao Mazo de Mazonovo, un conxunto etnográfico que amosa o funcionamento tradicional dos fornos e mazos hidráulicos.
A mediodía, os participantes compartirán unha comida no Restaurante Casa Pedro, tamén en Santa Eulalia. Xa pola tarde, a excursión continuará cun paseo ata a coñecida fervenza de Morlongo, en Vilanova de Oscos. Trátase dunha camiñada de dificultade baixa, polo que é apta para persoas de todas as idades.
O prezo da actividade varía segundo a vinculación coa asociación: 35 euros para persoas socias, 45 euros para non socias e 20 euros para nenos e nenas de ata 12 anos. Este importe inclúe o transporte en autobús, as entradas ás visitas programadas e a comida.
A organización lembra que as prazas son limitadas, polo que se recomenda facer a reserva canto antes. As persoas interesadas poden contactar con María José no número 657 10 95 92. O prazo para anotarse remata o domingo 18 de maio.