A Xunta rexeita o ERTE de Sargadelos e insta á empresa a retomar a actividade de inmediato
A Xunta de Galicia vén de denegar o Expediente de Regulación Temporal de Emprego (ERTE) presentado pola dirección da planta de Sargadelos en Cervo, ao entender que a proposta “non se axusta á normativa vixente” e presenta diversas incongruencias que impiden a súa aprobación. Como autoridade laboral competente, o Executivo autonómico requiriu á empresa nova información e documentación complementaria, ao tempo que instou á reanudación da actividade “o antes posible” en defensa dos dereitos das persoas traballadoras. O Goberno galego reiterou, ademais, que velará polo estrito cumprimento da lexislación laboral e que denunciará calquera irregularidade que poida ser detectada.
Sobre o proceso negociador que se vén desenvolvendo desde o mes de abril, a Xunta lembrou que actuou en todo momento “con absoluta responsabilidade”, mantendo un diálogo constante coa empresa, co cadro de persoal e coa Inspección de Traballo. O obxectivo destas conversas foi garantir que a dirección dispuxese da máxima flexibilidade —sempre dentro do marco legal— para executar as obras necesarias e dar resposta ás deficiencias sinaladas polos informes oficiais.
Froito destas xestións, a Inspección de Traballo concedeu a Sargadelos un prazo amplo para acometer as intervencións incluídas nos requirimentos de marzo de 2025 e setembro de 2024. Neste contexto, onte mesmo levouse a cabo unha visita de carácter rutineiro ás instalacións co fin de comprobar o grao de cumprimento das actuacións previstas.
A Xunta recordou que está a colaborar na financiación das obras, tendo en conta a singularidade da fábrica, declarada Ben de Interese Cultural desde o ano 2014. Neste marco de cooperación institucional, xa se completaron os estudos sobre o sistema de ventilación e extracción, así como parte das melloras esixidas pola Inspección.
O Executivo galego remarcou tamén que a corrección das deficiencias detectadas é “totalmente compatible” coa continuidade da actividade industrial, garantindo en todo momento a seguridade e saúde do persoal. Nese sentido, insistiu en que non hai impedimento técnico nin legal para que a planta siga operativa mentres se completan as obras.