A Xunta impulsa novas obras en centros educativos de Viveiro por máis de 740.000 euros
O conselleiro de Educación, Ciencia, Universidades e Formación Profesional, Román Rodríguez, mantivo un encontro coa alcaldesa de Viveiro, Mariña Gueimunde, no que repasaron o estado dos proxectos educativos que a Xunta está a desenvolver no municipio ao abeiro do Plan de Nova Arquitectura Pedagóxica. Esta iniciativa busca modernizar os centros escolares galegos para adaptalos ás necesidades do ensino do século XXI, apostando pola eficiencia enerxética e a flexibilidade dos espazos.
Durante a reunión, o titular de Educación anunciou que este mesmo día se licitaron oficialmente as obras comprometidas en dous centros de ensino viveirenses. No CEIP de Celeiro está previsto o cambio das carpinterías e a instalación dun aseo adaptado, cun investimento previsto de 320.000 euros. Pola súa banda, no CEIP Plurilingüe Santa Rita acometeranse melloras puntuais por valor de 420.000 euros, que inclúen a renovación de carpinterías e a colocación de caixas de persianas, entre outras actuacións.
Ademais, Román Rodríguez lembrou que hai dúas intervencións máis xa comprometidas no municipio. Unha delas é a ampliación do IES María Sarmiento, cun orzamento estimado dun millón de euros, e para a cal se están ultimando os requisitos necesarios para iniciar a redacción do proxecto. A outra afecta ao IES Vilar Ponte, onde se renovarán as carpinterías por un importe de arredor de 225.000 euros; esta última obra atópase actualmente en fase de supervisión técnica.
No marco deste mesmo plan, o conselleiro destacou que Viveiro xa ten visto finalizadas outras actuacións destacadas nos últimos tempos. Entre elas, a rehabilitación integral do IES María Sarmiento, que contou cun orzamento de 810.000 euros, ou as melloras efectuadas na Escola de Educación Infantil San Roque, nas que se investiron 302.000 euros.