A Xunta apoia a Faba de Lourenzá con axudas de ata 2.000 euros por hectárea
A Consellería do Medio Rural activará axudas directas, de carácter excepcional, para os produtores inscritos na Indicación Xeográfica Protexida (IXP) Faba de Lourenzá. O obxectivo desta medida é poñer en valor a calidade diferenciada deste produto, que representa un símbolo de identidade para a comarca, segundo destacou a conselleira María José Gómez.
Estas axudas, suxeitas a mínimis, canalizaranse a través dun convenio coa IXP para garantir que os fondos cheguen aos produtores. Ademais de apoiar aos actuais fabeiros, tamén buscan incentivar a incorporación de novos produtores ao selo de calidade. O importe estimado é duns 2.000 euros por hectárea.
A conselleira anunciou esta iniciativa nun encontro celebrado en Ribadeo con alcaldes e representantes municipais da zona, entre eles o rexedor local, Daniel Vega. Tamén participou o director da Axencia Galega da Calidade Alimentaria, Martín Alemparte.
Financiamento para a sementeira
Xunto a estas axudas, María José Gómez anunciou a apertura dun novo instrumento financeiro a partir de abril para facilitar liquidez aos agricultores e gandeiros galegos, con especial atención aos produtores da Faba de Lourenzá. Esta medida busca paliar os efectos do temporal Kirk e das intensas choivas posteriores, que dificultaron os cultivos.
A Xunta cubrirá os intereses e os gastos de formalización e avais, permitindo que os beneficiarios só teñan que devolver o importe do crédito, sen custos adicionais. A iniciativa tamén dará apoio aos agricultores que traballan co millo forraxeiro.
Máis medidas para fortalecer o sector
A Xunta está a pechar un calendario de xornadas formativas no centro Pedro Murias, co obxectivo de mellorar as prácticas agronómicas dos produtores. A intención é converter este centro nun referente na investigación e formación sobre a Faba de Lourenzá, con ensaios en parcelas reais para analizar enfermidades e optimizar os marcos de plantación.
Outras medidas inclúen a modificación do prego de condicións da IXP para mellorar a comercialización, a busca de saídas para a faba manchada e o reforzo das campañas de promoción.
A conselleira tamén fixo fincapé na importancia dos seguros agrarios, considerados clave para a profesionalización do sector. Recordou que a Xunta destina este ano 9,5 millóns de euros a financiar pólizas, cubrindo arredor do 10% do valor da produción asegurada.
María José Gómez reafirmou así o compromiso do Goberno galego co sector da Faba de Lourenzá, mediante axudas directas, financiamento e accións para a formación e a innovación.