A X edición do festival Osa do Mar de Burela chega cargada de actuacións musicais en setembro
![presentacion-osa-do-mar-festival-2023](https://amarinaxa.com/wp-content/uploads/2023/08/presentacion-osa-do-mar-festival-2023.jpg)
O X Festival Osa do Mar 2024, que terá lugar os vindeiros 6, 7 e 8 de setembro, presentarase na Praza da Mariña de Burela, no que estarán representadas institución, empresas patrocinadoras e a Asociación Cultural Fanto Fantini.
Despois do acto terá lugar na mesma praza a actuación do grupo ABRIL, un directo enmarcado dentro do acordo de colaboración establecido entre Mahou e a Fundación Paideia, co obxectivo de apoiar o talento e impulsar proxectos musicais incluídos dentro dos programas de aceleración promovidos pola Fundación.
Tamén se quixo dar as grazas aos pequenos patrocinadores que colaboraron co Festival a través de diferentes fórmulas e desde Fanto Fantini animan ás empresas a que sigan mercando o Bono A Marosa para empresas colaboradoras.
Os organizadores avisan aos interesados que “non se durman para mercar as entradas, xa que se leva vendido máis do 60 % do aforo” destacando “o ambiente que cada ano se crea en un evento que é moito máis que un festival”.
O delegado territorial de Lugo, Javier Arias, felicitou aos promotores, “porque grazas ao seu empeño o Osa do Mar figura entre os festivais de música máis consolidados no panorama da Mariña”. Remarcou que a cantidade de público que acude a Burela para desfrutar dos concertos xera un impacto positivo na economía local.
O delegado tamén gabou “a aposta que fan pola música en galego e feita desde Galicia”, coa presenza de artistas consagrados como Iván Ferreiro xunto con outros como Tanxugueiras, Mondra, Grande Amore ou The Rapants.
Por último, Arias asegurou que dende hai anos o Goberno galego está a contribuír á celebración de eventos deste tipo en moitos concellos da provincia co obxectivo de que a programación cultural chegue a todo o territorio.
CONSULTA TODO O PROGRAMA PREMENDO AQUÍ