A veciña de Burela Rosario Balseiro cumpre 100 anos e convértese na única centenaria do concello
![Rosario-Balseiro-centenaria-burela](https://amarinaxa.com/wp-content/uploads/2024/05/Rosario-Balseiro-centenaria-burela.jpg)
O Concello de Burela felicita á veciña Rosario Balseiro Valle polo seu 100 aniversario, converténdose na única persoa centenaria do municipio. A alcaldesa de Burela, Carmela López, e a concelleira de Igualdade e Servizos Sociais, Sandra Fernández, visitaron persoalmente a Rosario para celebrar os seus 100 anos con tarta e brindando.
“Impresiona a inmensa vitalidade e forza de Rosario aos seus 100 anos, e de seguro as conservará por moitos anos máis”, afirma a alcaldesa. “Dende o Concello transmitímoslle os nosos parabéns tanto a ela como a toda a súa familia”, sinalou.
“Burela é un Concello cunha gran calidade de vida, no que coidar ás persoas maiores e garantir o seu benestar é unha prioridade do Goberno local”, destacou a rexedora. “A nosa veciña máis lonxeva segue a practicar as súas moitas afeccións, como a pintura ou as sopas de letras, con total lucidez”, apunta pola súa banda a concelleira de Igualdade e Servizos Sociais. “Desexámoslle que cumpra moitos máis estando así de ben”, engadiu.