A Valedora do Pobo dá a razón ao BNG de Ribadeo nunha queixa pola falta de acceso á información municipal
O BNG de Ribadeo valorou de maneira moi positiva a resolución emitida pola Valedora do Pobo na que se lle dá a razón á formación nacionalista na queixa presentada contra o goberno municipal do Partido Popular por impedir o acceso a documentación e información do Concello.
Segundo explican desde o grupo municipal do BNG, a reclamación fora presentada tras comprobar as reiteradas dificultades que atopaban á hora de consultar determinados expedientes relacionados coa xestión municipal. Entre os asuntos polos que solicitaran información figuraban facturas e documentación vinculada a empresas e servizos contratados polo Concello.
A resolución da Valedora do Pobo recoñece que o grupo municipal nacionalista viu vulnerado o seu dereito de acceso á información, un instrumento que consideran fundamental para poder exercer a súa función de control e fiscalización da acción do goberno local.
O portavoz do BNG en Ribadeo, Martín Graña, asegurou que o ditame da institución avala as denuncias que a formación viña realizando nos últimos meses. “Esta resolución confirma o que levamos tempo sinalando: o goberno municipal do PP está a poñer trabas de maneira sistemática á transparencia e ao dereito da oposición a acceder á información pública”, afirmou.
Graña insistiu en que a documentación municipal non pode ser tratada como unha concesión do executivo local, senón como un dereito recoñecido democraticamente aos grupos da oposición. “O acceso á información non é un favor que concede o alcalde nin o seu goberno, senón unha ferramenta imprescindible para garantir o control da acción de goberno e para defender os intereses da veciñanza”, explicou.
Desde o BNG tamén expresaron a súa preocupación polo que consideran unha actitude reiterada de bloqueo por parte do executivo local. Neste sentido, o portavoz nacionalista apuntou que “cando se poñen tantas dificultades para acceder á información pública, é inevitable preguntarse se hai algo que non se quere que se coñeza”.
A formación anunciou ademais que volverá solicitar acceso a determinados expedientes relacionados co Hospital-Asilo de Ribadeo, despois de que o goberno municipal lles denegase a consulta desa documentación a pasada semana. Segundo indicou Graña, a intención do grupo municipal é insistir na petición para poder revisar eses documentos.
“Imos volver solicitar esa información porque temos dereito a consultala e porque forma parte da nosa responsabilidade como grupo da oposición”, sinalou o portavoz do BNG.
Por último, desde a formación nacionalista advertiron que, no caso de que o goberno municipal manteña a súa negativa a facilitar a documentación requirida, non descartan volver recorrer á Valedora do Pobo. “Se persisten en impedir o acceso á información, acudiremos de novo ás vías institucionais necesarias para defender os dereitos democráticos da oposición e garantir a transparencia na xestión municipal”, concluíu Graña.