A Unidade Móbil de Axuda coas Reclamacións estará no Hospital da Mariña o día 7
A Plataforma Sanitaria da Mariña anuncia que a Unidade Móbil de Axuda coas Reclamacións (UMAR) desprazarase novamente ata a entrada principal do Hospital da Mariña o vindeiro martes 7 de xuño en horario de 11 a 13 horas. O dispositivo móbil axudará a redactar e rexistrar reclamacións por agardas excesivas na realización de probas diagnósticas, en citacións para consultas ou en intervencións , a todas as persoas que se acheguen ata alí .
Desde o colectivo sanitario animamos a todas aquelas persoas que se atopen nestas situacións para que fagan efectiva a súa reclamación, constatando así as eivas que están a sufrir os servizos sanitarios públicos de xeito oficial e dando a oportunidade á dirección do centro e á administración sanitaria para corrixir estas situacións, pois “na maioría dos casos trátase de agardas que superan con moito os tempos aceptables de atraso , obviándose a situación límite na que se atopan moitos servizos “- comentan desde o colectivo sanitario.