A UNED de Lugo e AUGC selan un acordo para impulsar formación e actividades de extensión universitaria
A UNED de Lugo e a Asociación Unificada de Gardas Civís (AUGC) formalizaron un convenio de colaboración co obxectivo de promover conxuntamente iniciativas de extensión universitaria dirixidas tanto aos membros da entidade como á sociedade en xeral. O acordo foi rubricado pola directora do centro universitario lucense e, en representación de AUGC, polo seu secretario xeral a nivel estatal, Juan Antonio Fernández Hernández.
Este marco de colaboración permitirá impulsar accións formativas e divulgativas en ámbitos de interese social, reforzando a cooperación institucional e facilitando o intercambio de coñecemento e experiencias profesionais entre ambas entidades. A iniciativa busca así contribuír á mellora da preparación e das competencias de profesionais vinculados a servizos públicos esenciais.
A primeira actividade derivada deste convenio terá lugar o 21 de maio de 2026 na Aula Universitaria de Foz, baixo o título “Comunicación de malas noticias na intervención das Forzas e Corpos de Seguridade e Emerxencias”. A proposta foi definida nun encontro de traballo entre a dirección da UNED de Lugo e Óscar Fustes, secretario xeral de AUGC en Lugo.
A acción formativa responde á necesidade de proporcionar aos profesionais ferramentas útiles para afrontar situacións especialmente delicadas, ofrecendo criterios psicolóxicos claros, pautas de comunicación eficaces e estratexias de regulación emocional que permitan actuar con maior seguridade profesional, rigor institucional e sensibilidade humana.
A actividade será gratuíta e desenvolverase en horario de 17:00 a 20:00 horas, coa posibilidade de asistencia tanto presencial como en liña, en directo ou en diferido. Con esta proposta, a UNED de Lugo reforza o seu compromiso coa extensión universitaria e co apoio á formación continua de profesionais que desempeñan unha función clave ao servizo da cidadanía.