A UNED de Foz iniciará o curso 2024/25 cunhas Xornadas de Portas Abertas
A UNED de Foz abre as súas portas para o curso académico 2024/25 cunhas Xornadas de Portas Abertas, que terán lugar do 23 ao 27 de setembro. Esta iniciativa, dirixida a estudantes potenciais, familias e a toda a comunidade interesada na educación a distancia, permitirá aos asistentes coñecer de preto a oferta formativa e as instalacións do centro.
A coordinadora da UNED de Foz, Marta Muíña, e a concelleira da Aula, Elena Martínez, destacaron que o evento ofrecerá sesións informativas sobre os programas de acceso, grao, idiomas e posgrao dispoñibles. As xornadas estarán abertas de 9.00 a 11.00 e de 15.30 a 20.30 horas, e permitirán aos visitantes interactuar co persoal académico e administrativo para obter orientación personalizada.
Elena Martínez subliñou que estas xornadas son unha excelente oportunidade para que os interesados descubran a metodoloxía semipresencial da UNED e as súas vantaxes. "Desde o Concello, consideramos moi beneficioso que a UNED se amose á veciñanza, achegando a educación superior á sociedade", afirmou Martínez.
A UNED de Foz, coñecida pola súa flexibilidade e apoio personalizado, tamén recorda que o período de matrícula está aberto ata o 22 de outubro de 2024. Para máis información e inscrición, os interesados poden visitar a páxina web da UNED ou acudir á secretaría da Aula Universitaria de Foz no IES de Foz. Tamén están dispoñibles os teléfonos 982.133.699 e 604.034.549 para consultas adicionais.