A Pontenova revive a memoria popular coa exposición e recital ‘A historia nos recunchos’
O vindeiro 22 de novembro ás 17:00 horas, o local parroquial Sagrado Corazón da Pontenova, antiga escola do lugar, acollerá unha xornada cultural baixo o título A historia nos recunchos, un evento que pretende recuperar a memoria colectiva a través da arte, a poesía e a música. A iniciativa, organizada por un grupo de veciños coa colaboración do Concello da Pontenova e do Centro de Iniciativas Turísticas, ofrecerá unha completa exposición de vestidos antigos, fotografías e obxectos cargados de historia, acompañada dun recital poético-musical.
A cita, que leva por lema “A historia nos recunchos dos armarios”, abrirase ás 17:00 horas coa presentación de Rocío Pérez Oliva, e continuará media hora despois cun recital de poesía con música ao vivo, no que participarán Suso Vilar Becerra, Alberto Torres Roca, Miguel Piñeiro Moure, Manuel López Torrente e Nerea Botana Díaz, xunto ás voces e interpretacións de Ángela Gómez de Ávila, Valeria Rego Pol, Ainara Samblás Fiallega e Erea González Gallo.
A proposta combina a memoria material —representada pola exposición de pezas de vestiario e imaxes antigas— coa memoria emocional e literaria das poesías que se escoitarán ao longo da tarde. O obxectivo, segundo explican desde a organización, é “poñer en valor esas pequenas historias familiares e cotiás que forman parte do noso pasado común e que non deberían perderse”.
O evento busca, ademais, crear un espazo de encontro e convivencia interxeracional arredor da cultura local. “Cada vestido, cada fotografía ou poema conta unha historia distinta, pero todas falan do mesmo: do tempo, da terra e das persoas que fomos”, sinalan os promotores da actividade.
Ao remate dos actos, os asistentes poderán compartir unha merenda de confraternidade, doada polo Concello da Pontenova, como peche simbólico dunha tarde dedicada á lembranza e á palabra. A organización agradece a colaboración veciñal e anima a toda a cidadanía a participar neste exercicio de memoria e cultura compartida.