A Pontenova prepara a décima Ruta Ecuestre para o 11 de abril
O concello da Pontenova acollerá o próximo 11 de abril de 2026 a X Ruta Ecuestre, unha iniciativa que volverá reunir a numerosos afeccionados ao mundo do cabalo nunha xornada que combina deporte, natureza e convivencia. O evento alcanza xa a súa décima edición, consolidándose como unha cita destacada para os amantes das rutas a cabalo na comarca.
A programación comezará pola mañá, ás 10:00 horas, cun café no Lar de Balbina, que servirá como punto de encontro para os participantes antes do inicio da actividade. Posteriormente, ás 10:30 horas, terá lugar a saída desde a área recreativa do Pozo da Ola, desde onde partirá a ruta ecuestre polos camiños da contorna.
A xornada está pensada non só como unha actividade deportiva, senón tamén como un espazo de encontro entre participantes e público. Tras o percorrido celebrarase unha comida de confraternidade. O prezo do ticket será de 30 euros, mentres que para os nenos e nenas será de 15 euros.
As persoas interesadas en participar poden realizar a súa inscrición contactando cos organizadores a través dos teléfonos 662 062 625 (Pepín) e 633 913 203 (Noelia).
Desde a organización lembran que cada xinete será responsable dos posibles danos que poida ocasionar o seu cabalo durante o desenvolvemento da actividade. A iniciativa conta coa colaboración de numerosas empresas da zona e co apoio institucional do concello, que contribúe á celebración dun evento que promove a tradición ecuestre e dinamiza a vida social do municipio.