A Ponte dos Santos en Ribadeo será monitorizado cun contrato de 1,85 millóns
O Ministerio de Transportes e Mobilidade Sustible vén de adxudicar por 6,45 millóns de euros un contrato para a instrumentación e avaliación continua do comportamento estrutural e xeotécnico de elementos singulares da Rede de Estradas do Estado. O obxectivo é previr posibles patoloxías en grandes infraestruturas como pontes e ladeiras, mellorando o seu mantemento e conservación.
O contrato foi dividido en catro lotes por áreas xeográficas, sendo o Lote 3: Pontes Norte o correspondente á Autovía A-8 en Asturias, cun importe de 1,85 millóns de euros, no que se inclúe a Ponte dos Santos sobre a ría de Ribadeo. Esta infraestrutura, clave na comunicación entre Galicia e Asturias, contará cun sistema de monitorización avanzado para controlar o seu estado e detectar posibles deficiencias estruturais.
A actuación prevé a instalación de sensores e sistemas de adquisición de datos en tempo real, permitindo a detección temperá de problemas estruturais e garantindo un seguimento preciso. A información recollida integrarase na plataforma de monitorización da Dirección Xeral de Estradas, onde se centralizan os datos das infraestruturas vixiadas.
Este proxecto está financiado polos fondos europeos NextGenerationEU dentro do Plan de Recuperación, Transformación e Resiliencia, que busca a modernización das infraestruturas viarias mediante a dixitalización e o uso de tecnoloxía avanzada.