A plataforma veciñal denuncia listas de agarda “insoportables” en Ribadeo
A veciñanza de Ribadeo volveu poñer cifras a unha situación que cualifican de crónica. Entre os días 2 e 5 de xaneiro, tres persoas adultas solicitaron consulta para Atención Primaria no Centro de Saúde de Ribadeo a través da web do Sergas. En dous dos casos a resposta foi que non se podía facilitar cita e que debían acudir persoalmente ao propio centro para pedila, mentres que no terceiro usuario ofreceuse data para o 23 de xaneiro.
Tras comentar estes feitos con profesionais sanitarios, o colectivo recibiu a explicación de que nesas xornadas só había dous médicos pasando consulta, a mesma dotación que se agardaba para os días seguintes. Segundo relatan desde a plataforma, as xubilacións coñécense con antelación, pero non se están a cubrir co persoal necesario, o que provoca que o progreso das substitucións sexa practicamente nulo e que as esperas se alonguen ano tras ano.
Neste contexto, lembran que o 23 de decembro o Concello aprobou en pleno un novo trámite para ceder á Xunta uns terreos preto da estación de servizo do Xardín, destinados á construción dun futuro Centro de Saúde na parroquia de Ove, a arredor dun quilómetro do actual. Os promotores do escrito consideran que o traslado non dará resposta ás persoas maiores, ás máis novas e ás súas familias, e critican que na documentación publicitaria se fale de máis consultas e aparcamentos, pero non apareza “nin unha soa palabra” sobre a cuestión clave: a falla de persoal sanitario.
Para rebater a desculpa de que non existen médicos dispoñibles, achegan o dato de que o Ministerio de Sanidade publicou 17.553 solicitudes na última convocatoria de prazas MIR, cuxos exames terán lugar o 24 de xaneiro. A xuízo do colectivo, esa cifra reflicte un volume amplo de profesionais sen posto fixo ou con intención de mellorar o seu estatuto laboral e que poderían ser candidatos para ocupar vacantes que seguen eternizándose.
O ton do escrito é duro e directo. “Non hai que ter pouca cara para darnos verzas podres para facer o caldo”, sinalan, ao entender que o problema non é de edificios, senón de xestión do persoal das consultas. A plataforma fai un chamamento aos ribadenses de todas as idades e condicións para reaccionar ante o que cualifican de tomadura de pelo e insiste en que o funcionamento do Centro de Saúde actual continúa sen unha resposta efectiva.
Desde a mobilización conclúen que resulta imposible falar de competitividade ou de calidade asistencial mentres moitas persoas carecen de médico de familia asignado e as primeiras citas xa superan os vinte días. O futuro peirao sanitario de Obe, engaden, poderá ser máis grande, pero seguirá baleiro se non se aposta por dotar ao servizo do persoal necesario.