A organización do I Half Triatlón Ribadeo precisa voluntarios
A organización do I Half Triatlón Ribadeo precisa da colaboración de 150 voluntarios para o desenvolvemento da proba o vindeiro 15 de maio.
Desde a Área de Deportes do Concello solicitan “a colaboración de todas as entidades deportivas, clubs e asociacións ou voluntariado en xeral...posto que serán necesarios 150 voluntarios para os diversos cruces de carreira, e ao ser tan longa tentaremos incluso facer varias quendas para que non teñan que estar os voluntarios tanto tempo”.
E engaden que “precisamos que os voluntarios estean ás nove da mañá no punto do percorrido que se lles indicará previamente. Algúns poderán estar un pouco máis tarde. E rematarían entre as dúas do mediodía e as cinco da tarde”.
As persoas que estean dispostas a colaborar como voluntarios poden anotarse na Área de Deportes do Concello indicando nome e apelidos, DNI, data de nacemento, dirección de correo electrónico, dirección, número de teléfono móbil, talla de camiseta, club ou asociación á que pertencen, carné de conducir (os que o teñan) e dispoñibilidade de conducir. Desde a Concellaría de Deportes explican que “todos eses datos poden remitilos por correo electrónico a deportes@ribadeo.org, a inscrición tamén se pode facer chamando por teléfono á Casa da Xuventude ao 982 129 889 ou poden, si lles é máis sinxelo, anotarse directamente na páxina de voluntariado da carreira, no seguinte enlace:
https://www.rockthesport.com/es/evento/half-triatlon-ribadeo/inscripcion/formulario
A Área de Deportes mantivo un encontro cos presidentes das asociacións de veciños das parroquias polas que discorrerá esta proba. Con eles estiveron o concelleiro e o técnico de Deportes, Jorge Díaz e Iván López.
O Concello ribadense colabora na organización do I Half Triatlón Ribadeo que se vai celebrar o 15 de maio. A proba é puntuable para o Ranking Nacional de Triatlón de Media e Larga Distancia e contará coa participación de máis de 500 atletas. A inscrición segue aberta en www.halftriatlonribadeo.com.
