A música con nome de muller toma Burela co ciclo Maraxes da Osa este venres
Burela prepárase para o inicio dunha nova proposta cultural centrada na promoción da música feita por mulleres. O ciclo “Maraxes da Osa” comeza este venres 11 de abril coa actuación da cantante Marilia Monzón na Casa da Cultura, a partir das 21:00 horas, cunha apertura de portas ás 20:30.
Esta iniciativa, impulsada pola Asociación Fanto Fantini e co patrocinio principal do Concello de Burela, nace co obxectivo de crear un espazo de visibilidade para o talento feminino nun sector onde aínda queda camiño por percorrer en termos de igualdade. As entradas están dispoñibles na web oficial www.osadomar.com e na plataforma Wegow. As persoas que xa adquiriran a súa entrada para o festival Osa do Mar 2025 poden beneficiarse dunha promoción especial, que lles permite obter un desconto de cinco euros ao mercar a entrada para calquera dos concertos do ciclo, sempre que empreguen o mesmo correo electrónico co que fixeron a compra anterior.
A concelleira de Cultura, Lina Gómez, expresou o apoio firme do Concello a este tipo de iniciativas, destacando que Maraxes da Osa non só achega cultura á vila, senón que tamén promove valores como a igualdade, a diversidade e a participación. Salientou ademais o papel fundamental de Fanto Fantini á hora de converter esta proposta nun referente local.
O ciclo continuará nas vindeiras semanas con tres actuacións máis, todas elas tamén na Casa da Cultura de Burela: Mercedes Cañas o 10 de maio, Yarea o 14 de xuño e Caamaño & Ameixeiras o 28 de xuño.
Gómez subliñou que Burela é un pobo dinámico e aberto, e que iniciativas coma esta reforzan a súa identidade cultural e contribúen á creación dun tecido social máis xusto e igualitario. Tamén animou a veciñanza e visitantes a apoiar o ciclo e a seguir apostando pola cultura como motor de cambio e cohesión.