A mocidade protagoniza o Festival Infantil de Baile e Música Tradicional en Burela
A Sociedade Cultural Ledicia de Burela organiza para o domingo 30 de marzo, ás 18:00 horas, un Festival Infantil de Baile e Música Tradicional que se desenvolverá no Auditorio da Casa da Cultura. A entrada será de balde para todas as persoas asistentes, convertendo o evento nunha oportunidade para gozar da cultura popular galega.
No festival actuarán tres recoñecidos grupos da Mariña lucense: a Asociación Cultural Amado Lar, de Ferreira do Valadouro; a Asociación Cultural Osorio Gutiérrez, de Lourenzá; e a propia Sociedade Cultural Ledicia, anfitrioa do evento.
Esta cita anual supón a culminación do traballo realizado durante os meses de outono e inverno. Tal como a primavera trae o espertar da natureza, esta mostra serve para exhibir o esforzo e a paixón das novas xeracións pola música e a danza tradicional. Ademais, este evento enmarcase dentro da celebración do 50º aniversario da Sociedade Cultural Ledicia, reafirmando a súa aposta pola preservación do patrimonio inmaterial galego.
Desde a organización convidan a toda a veciñanza a compartir esta xornada de cultura e tradición. Tamén quixeron agradecer a colaboración do Concello de Burela, que cedeu as instalacións municipais para facer posible o festival, así como o compromiso dos grupos participantes que aceptaron a invitación a este encontro festivo.